Reynt að raska ekki leikskólum

Bergur Felixson, framkvæmdastjóri Leikskóla Reykjavíkur, segir að reynt verði að skipuleggja starfsemi leikskóla þannig að röskun vegna verkfalls grunnskólakennara verði sem minnst. Eins og við höfum greint frá hefur einn leikskólastjóri í Reykjavík sent foreldrum barna á skólanum bréf, þar sem bent er á að til þess geti komið að senda þurfi börn heim ef starfsmenn skólans geti ekki mætt þar sem þeir þurfi að vera heima vegna eigin barna sem ekki eru í skóla vegna verkfalls grunnskólakennara. Hann telur þetta ótímabært, en minnir á að í svokölluðum dvalarsamningi sem gerður er milli forráðamanna leikskólabarna og leikskólanna, sé ákvæði um hámarksfjölda barna á hvern starfsmann.