Ljósaperur gegn eiturlyfjanotkun

Ljósaperur með blárri birtu eru notaðar á salernum skiptistöðva Strætós við Hlemm og í Mjóddinni í Reykjavík til að gera fíkniefnaneytendum erfiðara fyrir að sprauta sig. Perurnar hafa reynst vel en töluvert ber á því að þeim sé stolið.  Ljósaperunum var komið fyrir á skiptistöðvunum eftir að forsvarsmenn Strætós og lögreglan ræddu saman um þær afleiðingar sem hlotist geta af fíkniefnaneyslu fólks. Víða erlendis hefur samskonar perum verið komið fyrir á salernum á opinberum stöðum og á salernum veitingahúsa, en bláa birtan gerir fíkniefnaneytendum erfiðara fyrir með að finna æð og sprauta sig. Reynslan af þessu hefur verið góð hér á landi að sögn Þórhalls Halldórssonar, deildarstjóra hjá Strætó bs. Hann segir perurnar í Mjóddinni samt hafa verið að hverfa, sérstaklega í síðustu viku, en verið sé að gera ráðstafanir til að sporna við því.