Bíósýningar að nýju á Selfossi

Kvikmyndasýningar munu hefjast að nýju á Selfossi í vetur eftir 20 ára hlé. Eigendur Hótel Selfoss hafa undirritað samstarfssamning við Einar Rúnar Einarsson og Magnús Ninna Reykdalsson á Selfossi um rekstur á Selfossbíói í hótelinu. Fyrsta bíósýningin verður 1. desember næstkomandi. Frá þessu greinir á fréttavef Suðurlands. Einar og Magnús hafa gert samning við öll kvikmyndahús í Reykjavík um sýningar á þeim myndum sem sýndar eru þar, bæði frumsýningar og forsýningar á stórum myndum á sama tíma og í Reykjavík, og svo mun líða kannski 1-2 vikur frá frumsýningu á öðrum myndum þar til þær eru sýndar í Selfossbíói. Þeir félagar segja að kostnaður við að koma bíóinu upp verði um 90 milljónir króna enda er engu sparað til í tækjabúnaði, sætum og annari umgjörð í kringum bíóið. Um er að ræða tvo sali; sá stærri verður með 120 sætum og minni salurinn með 50 sætum. Sýningar verða alla daga vikunnar.