Óska eftir 2.500 sjálfboðaliðum

Landssöfnunin "Göngum til góðs" hefst laugardaginn 2. október. Þá munu íþróttamenn fara í tveggja tíma göngu í hús með söfnunarbauka milli klukkan 11 og 13 og safna peningum til handa börnum á stríðssvæðum. "Göngum til góðs" er fjáröflunarátak Rauða krossins en Íþróttasamband Íslands, Knattspyrnusamband Íslands og Handknattsleikssamband Íslands eru samstarfsaðilar. Hugsunin er sú að íþróttamenn tileinki eina æfingu landssöfnuninni. Ein æfing tekur um það bil tvo tíma og því ganga íþróttamennirnir í hús í tvo tíma á laugardaginn eftir viku í stað þess að mæta á æfingu. Auk þess að fá íþróttamenn til að ganga í hús freistar Rauði krossinn þess að fá 2.500 landsmenn til að skrá sig sem sjálfboðaliða til að taka þátt í söfnuninni. Takmarkið er að banka upp á hjá hverjum einasta Íslendingi á laugardaginn eftir viku. Ólafur Ragnar Grímsson, forseti Íslands, Ellert Schram, forseti Íþrótta- og ólympíusambands Íslands, og Sigrún Árnadóttir, framkvæmdastjóri Rauða kross Íslands, munu kynna söfnunina sérstaklega í Smáralindinni klukkan 10.30 í dag. Á sama tíma verður opnuð ljósmyndasýning Þorkels Þorkelssonar sem tileinkuð er börnum í stríði.