ÍÚ braut jafnréttislög

Íslenska útvarpsfélagið og yfirmenn fréttastofu Stöðvar 2 og Bylgjunnar brutu jafnréttislög þegar þeir ráku fjóra kvenfréttamenn fyrir rúmu ári, samkvæmt niðurstöðu Kærunefndar jafnréttismála. Konunum fjórum var sagt upp á fréttastofunni síðasta sumar og ástæðan sögð sú að hagræða þyrfti í rekstri. Engir karlmenn voru reknir af fréttastofunni. Fleiri starfsmenn fyrirtækisins fengu uppsagnarbréf á sama tíma - að sögn stjórnenda um sjötíu. Tvær kvennanna kærðu uppsögnina til kærunefndar jafnréttismála sem krafði fyrirtækið um rökstuðning. Stjórnendur þess sögðu starfsaldur hafa ráðið miklu, en ekki öllu, án þess að fleiri ástæður hefðu verið tilnefndar. Á þessum tíma störfuðu færri konur en karlar á fréttastofunni og í það minnsta þrír karlmenn með lægri starfsaldur héldu störfum sínum. Þótti kærunefndinni að kærða hefði ekki tekist á málefnalegan hátt að sýna fram á að aðrar ástæður en kynferði hefði legið til grundvallar uppsögnunum. Hulda Gunnarsdóttir, önnur fréttakonan sem kærði uppsagnirnar, er ánægð með niðurstöðuna. Hún segist hafa talið sig órétti beitta og nú hafi það verið staðfest. Hulda segir að það muni koma í ljós, eftir að hún hafi ráðfært sig við lögmann sinn, hvort hún fari lengra með málið og þá sækjast eftir skaðabótum.   Kærunefnd jafnréttismála segir í úrskurði sínum að síðan hafi nýir fréttamenn verið ráðnir á fréttastofuna, þar af nokkrar konur og nýr fréttastjóri, sem jafnframt er kona. Það þykir þó ekki réttlæta hvernig gengið var fram þegar konunum fjórum var sagt upp. Hægt er að hlusta á viðtal við Huldu Gunnarsdóttur með því að smella á hlekkinn hér að neðan.