Flugmaður á gjörgæslu

Flugmaður lítillar eins hreyfils flugvélar af gerðinni Cessna 152 er á gjörgæslu eftir að stutt flugferð hans endaði í fjörunni við norðurenda flugbrautarinnar á Akureyri. Flugmaðurinn, sem ætlaði að fara í hálfrar klukkustundar flugferð um nágrenni Akureyrar, tók á loft skömmu fyrir klukkan ellefu í gærmorgun. Skömmu eftir flugtak missti flugvélin afl og brá flugmaðurinn þá á það ráð að lenda vélinni við enda flugbrautarinnar. Flugvélin kom niður við öryggissvæðið á norðurenda flugbrautarinnar og rann þaðan út af flugbrautinni og niður í fjöru. Slökkvilið og lögregla voru strax kölluð út en þegar þau komu á vettvang hafði flugmaðurinn komið sér út úr flugvélinni af sjálfsdáðum. Hann var fluttur með sjúkrabíl á Fjórðungssjúkrahúsið á Akureyri. Ekki er að fullu ljóst hvað olli því að flugvélin missti afl en Rannsóknarnefnd flugslysa fer með rannsókn málsins. Samkvæmt upplýsingum frá vakthafandi lækni á Fjórðungssjúkrahúsinu fótbrotnaði maðurinn og fór hann í aðgerð í gær. Líðan hans er eftir atvikum en hann er ekki talinn í lífshættu.