Vatnsskortur í Eyjum

Vestmannaeyingar gætu orðið uppiskroppa með ferskvatn eftir að tvær leiðslur sem flytja vatn til Eyja rofnuðu í gær. Skemmdirnar eru verulegar en talið er að vatnsbirgðir dugi í þrjá til fjóra daga. Talið er að grafa á dýpkunarpramma hafi rofið leiðsluna, en unnið hefur verið að dýpkun innsiglingarinnar að Vestmannaeyjahöfn undanfarið. Kafarar könnuðu umfang skemmdanna í gær. Gunnlaugur Erlendsson, kafari, segir að í ljós hafi komið að önnur leiðslan sé alveg í sundur en hin sé að minnsta kosti mikið skemmd. Verið sé að grafa ofan af leiðslunum núna, enda sé djúpt niður í sandinn, en framhaldið komi betur í ljós í kvöld. Fimm þúsund tonna varageymar eru í Eyjum, en ef ekki tekst að gera við leiðslurnar verður ferskvatnslaust í Eyjum innan fárra daga. Vestmannaeyingar eru beðnir um að fara sparlega með vatn, og sundlauginni hefur verið lokað. Vatnslagnirnar hafa áður orðið fyrir skemmdum, en í þetta eru þær mun víðtækara þar sem leiðslurnar fóru í sundur. Líklega verður að taka rörin í sundur og setja plastbúta á milli.