6 í haldi vegna fíkniefnasmygls

6 Íslendingar á fertugsaldri eru í haldi lögreglu í tengslum við rannsókn eins allra stærsta fíkniefnamáls sem komið hefur upp hér á landi til þessa.  Rannsóknin sem staðið hefur yfir frá því í mars er afar umfangsmikil á íslenskan mælikvarða. Þó enn eigi eftir að hnýta einhverja hnúta liggur ýmislegt fyrir. Málið hófst með því að þrjú kíló af amfetamíni og nokkuð magn kókaíns fundust í vörusendingu með Dettifossi Eimskipafélagsins. Í júlí fundust aftur fíkniefni í sendingu sem flutt var með sama skipi og segja heimildir að þá hafi magn verið enn meira en í mars. Enginn var handtekinn fyrr en síðasta föstudag þegar karlmaður um þrítugt var settur í járn í Vestmannaeyjum eftir að stór sending af LSD fannst í póstsendingu. Þann sama dag var íslenskur karlmaður handtekinn í Rotterdam, og eftir það þrír aðrir á Íslandi. Einum var sleppt að yfirheyrslu lokinni. Hollenska lögreglan gerði húsleit á heimili hins handtekna í Rotterdam. Þar var staddur sjötti maðurinn sem var handtekinn eftir að fíkniefni fundust á heimilinu. Búið er að úrskurða þá fjóra sem handteknir voru hér á landi í tveggja og þriggja vikna gæsluvarðhald en lögreglan í Hollandi hefur rýmri heimildir til að halda fólki án úrskurðar dómara. Mögulegt er að íslenska lögreglan fari fram á að annar hinna handteknu verði framseldur til Íslands.