Enginn samningur

Farmanna- og fiskimannasamband Íslands og Félag skipstjórnarmanna segja fullkomlega ósatt að samningur eða samningsdrög liggi fyrir milli áhafnarinnar á Sólbaki EA og Guðmundar Kristjánssonar útgerðarmanns. Í yfirlýsingu frá félögunum segir að Jóhannes Gunnarsson skipstjóri hafi í tvígang haldið slíku fram. Í yfirlýsingunni segir að Guðmundur, sá nú margfrægi útgerðarmaður hafi í ágúst sótt mjög hart að áhöfn Guðmundar í Nesi að skrifa undir viðlíka samning, en áhöfnin hafi neitað. Þá hafi hann í þrígang neitað að standa í samningagerð við áhöfn Rauðanúps, sem nú heitir Sólbakur, en á sama tíma hafi forysta sambandanna haft undirritaðan samning milli þeirra undir höndum. Guðmundur hafi ekki enn svarað þeirri spurningu hvort að hann hafi skrifað undir þann samning.