Mismunun segir Halldór Grönvald

Fólk sem ekki vinnur hjá ríkinu á ekki rétt á orlofsgreiðslum í fæðingarorlofi, samkvæmt dómi héraðsdóms í morgun. Aðstoðarframkvæmdastjóri Alþýðusambands Íslands segir fæðingarorlof því styttra en lög kveða á um og að fólki á vinnumarkaði sé mismunað. ASÍ höfðaði mál gegn Tryggingastofnun og krafðist þess að viðurkennt yrði að aðildarfélagar í sambandinu sem ávinna sér ekki rétt til orlofslauna í launalausu fæðingarorlofi, eigi rétt á orlofsgreiðslum úr Fæðingarorlofssjóði. Í niðurstöðu Héraðsdóms Reykjavíkur í morgun segir að réttur til orlofsgreiðslu verði ekki talinn til starfstengdra réttinda sem fólk öðlast samkvæmt kjarasamningum og samkvæmt tilskipun Evrópusambandsins eigi launþegar rétt á að minnsta kosti fjögurra vikna launuðu orlofi árlega, en sú tilskipun tryggi ekki rétt til slíkra greiðslna úr sjóðnum. Lögmaður ASÍ benti á að ríkisstarfsmenn ávinni sér slíkan rétt á meðan þeir eru í fæðingarorlfi og þarna sé því um mismunun að ræða. Héraðsdómur segir það misræmi ekki breyta efni Evrópureglnanna. Halldór Grönvold aðstoðarframkvæmdastjóri ASÍ segist ósáttur við útkomuna, enda segir hann að verið sé að staðfesta það að raunverulegur tími fæðingarorlofs fólks á vinnumarkaði sé ekki sá tími sem lögin geri ráð fyrir. Verið sé að skera almenna orlofstöku á móti. Einnig sé verið að mismuna fólki á vinnumarkaði, þar sem sumir njóti betri réttinda en aðrir úr ríkissjóði og það sé afleit niðurstaða, sem sé ekki í samræmi við niðurstöðuna sem félagsmálaráðherra hafi gefið Alþingi í fyrra. Ljóst er að þetta mál snertir marga og því hlýtur að vera brýnt að fá niðurstöðu Hæstaréttar í málinu og áfrýja því. Halldór segir að verið sé að skoða það núna og vel kunni að vera að matið sé það að lögin séu ekki fullkomnari en þetta og þá þurfi að leita réttar á hinum pólitíska vettvangi en ekki þeim lögfræðilega. Eins og fyrr segir, njóta ríkisstarfsmenn meiri réttinda en starfsmenn á almennum markaði hvað þetta varðar og er launþegum því mismunað. Halldór segir markmið laganna vera að jafna réttindi fólks á vinnumarkaði, en þessi framkvæmd gangi klárlega gegn því.