Áhöfn Sólbaks svarar fyrir sig

Áhöfnin á Sólbaki EA 7 segir forystumenn sjómanna, skipstjórnenda og vélstjóra draga áhöfnina niður í svaðið, gera lítið úr henni og fullyrða ítrekað að áhöfninni hafi verið stillt upp við vegg, með yfirlýsingum sínum um ráðningarsamninga áhafnarinnar.  Í yfirlýsingu frá áhöfninni segir að ýmislegt sé verulega til bóta í þeirra samningi samanborið við samninga annarra sjómanna og að það sé samdóma álit áhafnarinnar að bæði áhöfn og útgerð eigi að geta notið verulegs ávinnings af samningnum. Miðstjórn Alþýðusambands Íslands fundaði einnig um þetta mál í dag og átelur forsvarsmenn Brims, sem gerir Sólbak út, harðlega fyrir aðför að skipulögðum vinnumarkaði og umsömdum lágmarkskjörum. Í ályktun miðstjórnar ASÍ segir að að það sé óþolandi að forsvarsmaður Brims skuli leyfa sér að beita hótunum til þess að ná fram einhliða ásetningi sínum um breytingar á gildandi kjarasamningum, hvort sem hótunin sé um tekjumissi með kvótatilfærslum eða beinlínis atvinnumissi með uppsögn. Einnig lýsir miðstjórnin vonbrigðum með viðbrögð forsvarsmanna LÍÚ við þessu útspili Brims.