Tapið minnst 300 milljónir á viku

Þjóðarbúið tapar ekki minna en þrjú hundruð milljónum króna á viku vegna verkfalls grunnskólakennara.  Það er afar flókið að reikna út þjóðhagslegt tap af verkfalli grunnskólakennara. Ragnar Árnason, prófessor við viðskipta og hagfræðideild Háskóla Íslands, gerði þó tilraun til þess í snarhasti, að beiðni fréttastofu. Hann segir tapið að minnsta kosti ekki minna en það sem nemur andvirði vinnu kennaranna. Sveitarfélögin greiða grunnskólakennurum rúmlega 16 milljarða í laun í ár. Þegar skólastjórnendur hafa verið dregnir frá standa eftir rúmlega fimmtán og hálfur milljjarður. Það gerir 300 milljónir á viku, eða 43 milljónir á hverjum degi. Ragnar segir að þjóðhagslegt tjón vegna verkfallsins sé fyrst og fremst það að sérþjálfað vinnuafl 4300 manna nýtist ekki, og það tjón má meta upp á það sama og laun þeirra, eða 300 milljónir á viku. Ofan á það bætist að virðisauki vinnunnar tapast, og hugsanlegt tjón foreldra og fyrirtækjanna sem þeir vinna hjá. Þá segir Ragnar að í verkföllum verði félagslegt og sálrænt uppnám, sem meta má til þjóðhagslegs tjóns, enda snúist þjóðarhagur um mannlega velferð. Það megi því slá því föstu að þjóðhagslegt tjón vegna verkfallsins sé meira en 300 milljónir á viku.