Hani gerðist laumufarþegi

Ásthildi Guðjónsdóttur, bílstjóra hjá Teiti Jónassyni, brá ekki lítið þegar hún sá bústinn hana á vappi á bílastæði fyrirtækisins í Kópavogi. Hún hafði nefnilega séð þennan sama hana uppi á Indriðastöðum í Skorradal nokkrum klukkustundum áður. Enn skilur enginn hvernig hann komst í bæinn. "Ég fór með hóp í rútunni upp að Indriðastöðum," sagði Ásthildur, sem fór ferðina í fyrradag. " Síðan ók ég til baka. Þegar ég lagði rútunni á bílaplaninu í Kópavogi sá ég mér til mikillar furðu, að hani sem ég hafði veitt athygli á Indriðastöðum var á vappi á planinu. Við fönguðum hann og ettum í kassa. Hann hefur nú verið sóttur að ég best veit." Ásthildur kvaðst enga hugmynd um hvernig haninn hefði komist með rútunni í bæinn. Hann hefði ekki verið inni í henni, svo mikið væri víst.