Tugmilljóna tjón í Freysnesi

Tugmilljóna tjón varð þegar þak fauk af 300 fermetra álmu hótelsins í Freysnesi í Skaftafelli í  morgun og lenti á tengibyggingu, annarri álmu og bílum. Engan sakaði í hamförunum.  Hátt í 40 manns gistu á hótelinu í nótt og rigndi glerbrotum og braki yfir suma gestina sem flestir voru sofandi en engan sakaði. Þykir það með ólíkindum miðað við hvernig umhorfs er á svæðinu. Berglind Guðnadóttir, starfsmaður á hótelinu, vaknaði við ósköpin og fór strax að huga að gestunum. Hún segir þeim hafa verið smalað úr herbergjunum og niður í kjallara hússins. Að því loknu kom bíll björgunarsveitarinnar, svokallaður brynbíll, og ferjaði fólkið yfir í þjónustumiðstöðina í Skaftafelli. Berglind segir að hótelgestunum hafi brugðið nokkuð en samt haldið ró sinni og allt hafi gengið eins og í sögu.   Að sögn Jóns Benediktssonar staðarhaldara er nú komið í ljós að annað hús í hótelþyrpingunni hefur skekkst á grunninum og ljósastaurar brotnað eins og eldspýtur, enda var vindhraðinn gríðarlegur. Vindmælar hvor sínu megin við Freysnes, annars vegar á Steinum undir Eyjafjöllum og hins vegar á Sandfelli, sýndu allt að 52 metra á sekúndu og vindmælirinn á Hrauni undir Eyjafjöllum fauk hreinlega út í buskann og mælir ekki meir. 33 metrar á sekúndu eru tólf vindstig, eða fárviðri, þannig að vindhraðinn fór heilum 20 metrum á sekúndu, eða sem nemur einu hvassviðri, umfram fárviðrið. Björgunarsveitarmenn voru kallaðir á staðinn snemma í morgun til að koma í veg fyrir enn frekara tjón. Nú þegar er ljóst að það hleypur á tugum milljóna króna. Hótelið mun hins vegar vera hamfaratryggt þannig að það er væntanlega sterkbyggt vel að mati tryggingafélagsins. Nú er unnið að hreinsun og tiltekt en óljóst hvenær hægt verður að taka við gestum á ný í þær álmur sem heilar eru. Ljóst er þó að enduruppbygging á skemmdu álmunni mun taka einhvern tíma. Töluvert tjón varð einnig annars staðar á Suðvesturlandi í óveðrinu í nótt. Á bænum Velli í grennd við Hvolsvöll var maður í hættu þegar þak fauk í heilu lagi af gömlu mannlausu íbúðarhúsi og lenti á öðru íbúðarhúsi þar sem maðurinn stóð við glugga þegar brakið skall á húsinu og skemmdi klæðningu. Tré brotnuðu niður í nokkrum görðum á Hvolsvelli og járnplötur losnuðu þar af þökum, sem ekki hefur gerst síðan í febrúarveðrinu mikla fyrir þrettán árum. Vindhraði á þessum slóðum mældist allt að 44 metrum á sekúndu í nótt. Þar og víða annars staðar voru björgunarsveitir kallaðar út til að hefta fjúkandi stillasa, gervihnattadiska og ýmislegt lauslegt, sem fólk er ekki búið að njörva niður fyrir veturinn. Í Eyjum fauk járnplata meðal annars í gegnum stofuglugga og inn á gólf. Björgunarsveitarmenn voru kallaðir út til aðstoðar. Þá komst Herjólfur ekki út samkvæmt áætlun og fer hann ekki fyrr en klukkan fjögur í dag enda er enn haugabrim í Þorlákshöfn. Allt innanlandsflug lá líka niðri í morgun en hefur verið að komast í samt lag. Í morgun hafði lögreglunni í Reykjavík borist tíu beiðnir um aðstoð vegna foks af ýmsu tagi og björgunarsveitarmenn létu til sín taka á tuttugu stöðum. á einum stað liðaðist meðal annars húsbíll í sundur eftir að vindur komst inn í hann. Þá voru björgunarsveitarmenn kallaðir í suðurbugt Reykjavíkurhafnar til að hemja þar báta  flotbryggjur og landganga. Þar varð eitthvert tjón á bátum. Á Selfossi var hins vegar minni vindur en þar gerði úrhellis rigningu upp ur klukkan þrjú í nótt. Á Reykjanesi var hvasst í nótt en hvergi til vandræða svo vitað sé og millilandaflug gekk samkvæmt áætlun. Að sögn Einars Sveinbjörnssonar veðurfræðings er veðrið nú víðast hvar gengið niður og til norðurs og farið er að hvessa um norðanvert landið. Þar verður vindhraðinn þó hvergi nærri eins mikill og hann var á Suðurlandi í nótt. Hægt er að hlusta á viðtal við Berglindi Guðnadóttur, starfsmann hótelsins í Freysnesi, úr hádegisfréttum Bylgjunnar með því að smella á hlekkinn hér að neðan.