Hafnarfjarðarlöggan á skjáinn

Nýr íslenskur gamanþáttur, Hafnarfjarðarlöggan, verður frumsýndur á Stöð 2 föstudaginn 24. september. Leikstjóri er Hallur Helgason og með aðalhlutverk fara Steinn Ármann Magnússon, Björk Jakobsdóttir, Jón Páll Þorbergsson, Bergþór Pálsson og Nanna Gunnarsdóttir. Að sögn Halls Helgasonar er um prufuþátt að ræða sem var tekinn upp á síðasta ári og því óvíst hvort fleiri slíkir verði framleiddir. Fer það aðallega eftir viðbrögðum almennings. "Steinn Ármann leikur Einar, aðalvarðstjórann í Hafnarfirði, sem á í basli með sitt einkalíf," segir Hallur. Hann segir að verkefnið hafi verið hugsað sem gamanþáttaröð í "sit-com" stíl en ekki svokölluðum "sketsastíl" þar sem hvert atriði segi eina sögu. "Grínið í þættinum sprettur meira upp úr aðstæðum heldur en stökum bröndurum," bætir Hallur við. "Það hefði verið skemmtilegra að framleiða fleiri þætti og gefa áhorfendum tækifæri til að kynnast persónunum betur. En það verður bara að koma í ljós hvort af því verði."