Heilsuskóli er verkfallsbrot

Kennarasambandið telur það verkfallsbrot ef fyrirtæki bjóða upp á barnagæslu fyrir starfsmenn meðan á kennaraverkfalli stendur. Íslandsbankamenn lýsa undrun sinni yfir þessari afstöðu. Íslandsbanki og Sjóvá - Almennar hafa sem kunnug er boðið starfsmönnum sínum að senda börn sín í svokallaðan Heilsuskóla í félagsheimili Þróttar í Laugardal, komi til verkfalls grunnskólakennara. Viðbrögð talsmanna kennara hafa verið tvennskonar. Í Fréttablaðinu í dag segist varaformaður Félags grunnskólakennara við fyrstu sýn ekki telja þetta verkfallsbrot enda hljóti einkafyrirtækjum að vera frjálst að gera það sem þau vilja. Önnur afstaða birtist hins vegar í dag frá Eiríki Jónssyni, formanni Kennarasambandsins. Hann segir skóla lokaða í verkfalli og því sé þeirri starfsemi sem þar eigi að fara fram úthýst. Því sé litið þannig á að þeir sem ætli sér að taka upp samsvarandi starfsemi annars staðar séu að fremja ígildi verkfallsbrots og stilli sér upp sem andstæðingar kennara og þau verði meðhöndluð sem slík. Jón Þórisson, aðstoðarforstjóri Íslandsbanka, segist hissa yfir afstöðu kennara, enda telji fyrirtækið að fjölskylduvæn stefna fari saman við hagsmuni kennara. Hann segist ekki sjá að þetta ógni Kennarasambandinu. Hann segir að þeir muni hitta kennara á morgun og þar verði farið yfir málin. Eiríkur segir þrátt fyrir þetta að ekki yrði litið á það sem verkfallsbrot ef foreldrar sjálfir tækju sig saman um barnapössun, enda sé það allt annað mál en þegar stórfyrirtæki standi fyrir slíku. Af kjaradeilunni er það hins vegar að frétta að þar er enn stál í stál og segir Eiríkur að eftir því sem tíminn líði án þess að neitt gerist aukist líkurnar á verkfalli, en þó sé rétt að halda í vonina í lengstu lög.