Annar höfunda Chicago allur

Fred Ebb, textahöfundur söngleikjanna Chicago og Cabaret, lést í gær í kjölfar hjartaáfalls. Ebb var einnig þekktur fyrir að semja textann við lagið New York, New York sem Frank Sinatra gerði ódauðlegt. Ebb starfaði aðallega með John Kander og voru þeir afar virkir í söngleikjagerð. Ellefu söngleikir eftir þá voru sýndir á Broadway og stórstjörnur eins og Liza Minnelli og Chita Rivera voru meðal leikenda. Ebb og Kander unnu töluvert með Minnelli og upp úr samstarfinu skrifuðu þau New York, New York. Mynd með sama nafni var síðan frumsýnd árið 1977 í leikstjórn Martin Scorsese. Ebb og Kander fengu fjölda verðlauna, þar á meðal Óskarsverðlaunin fyrir Chicago á síðasta ári. Ebb lærði í New York-háskóla og Columbia. Samstarf þeirra Kanders hófst á sjöunda áratugnum en fyrsta lagið sem þeir gáfu út saman var My Coloring Book sem Barbra Streisand söng.