Stjórnin vill efla dreifikerfið

Vilji er fyrir þvi innan beggja stjórnarflokka til að nýta hluta af því fé sem fæst með sölu Símans til að standa að útboði til að efla dreifikerfið. Öll símafyrirtæki gætu þá boðið í verkið og þannig yrði tryggt að allir landsmenn hefðu jafnan aðgang að gagnaflutningum. Ákvörðun liggur ekki fyrir en verkefnið myndi að líkindum kosta marga milljarða. Eins og við sögðum frá í fréttum í gær heimila Evróputilskipanir ekki að símafyrirtækjum séu sett skilyrði varðandi útbreiðslu dreifikerfis. Rannveig Rist stjórnarformaður Landsímans sagði í viðtali við Stöð 2 að á Landssímanum hvíldu engar slíkar kvaðir, stjórnendur fyrirækisins væru ekki skyldugir til að leggja kerfið á þá staði þar sem það svaraði ekki kostnaði nema ríkið sem á nær allan hlut í Landsímanum beiti áhrifum sínum sem hluthafi. Slíkar kvaðir gætu hinsvegar ekki fylgt með í kaupunum þegar Landssíminn verður seldur. Eins hefur komið fram settu framsóknarmenn það skilyrði fyrir einkavæðingunni að hún yrði ekki til að skerða dreifikerfið. Davíð Oddsson forsætisráðherra hefur sagt að hægt væri að nýta það fé sem kæmi inn við söluna til að efla kerfið. Kostnaðurinn hleypur þó á mörgum milljörðum samkvæmt upplýsingum frá stjórnarformanni Símans. Og það kann að koma mönnum spánskt fyrir sjónir að ríkið ætli að selja Landsímann og dreifikerfið og verja síðan almannafé til að efla það, þegar það er komið í hendur einkaaðila. Samkvæmt heimildum fréttastofu ræða menn úr báðum stjórnarflokkum nú um það að efnt verði til útboðs eftir söluna sem öll símafyrirtæki geti tekið þátt í. Það þeirra sem hreppir verkið fær síðan greitt úr ríkissjóði fyrir að leggja dreifikerfi til allra landsmanna, líka á þá staði þar sem það annars myndi ekki svara kostnaði.