Rækjuveiðimenn hlunnfarnir

"Þarna er hreint og beint um eignaupptöku af hálfu ríkisins að ræða og útgerðarmenn hlunnfarnir sem mest er hægt," segir Ásgeir Blöndal, útgerðarmaður á Blönduósi. Hann er einn þeirra sjómanna sem gerði út á innfjarðarrækju á Húnaflóa þegar þær veiðar gengu sem best en nú er stofninn hruninn. Þar fyrir utan hefur orðið mikið verðfall á rækju á mörkuðum undanfarin ár. "Rækjuveiðarnar hrundu hérna á Húnaflóanum og samkvæmt lögum um stjórnun fiskveiða segir að sé um hrun að ræða í því sem kallast sérveiðar þá beri að bæta slíkt. Það gerir sjávarútvegsráðherra ekki heldur þvert á móti þá sker hann reglulega niður." Ásgeir segir að áður en innfjarðarrækjustofninn hafi hrunið hafi hann verið að veiða sem nemur 185 þorskígildistonn að meðaltali ár hvert en nú sé hvert skip með tæp 40 þorskígildistonn. "Menn innan ráðuneytisins hafa gefið skýrt til kynna að þetta eigi að skerða enn frekar og kippa þannig fótunum undan þeim örfáu útgerðarmönnum sem enn berjast við að ná endum saman." Aðrir útgerðarmenn í nágrannabyggðum taka í sama streng. Eðvarð Daníelsson, sem gerir út frá Hvammstanga, finnst miður hvaða móttökur þeir fái í sjávarútvegsráðuneytinu þegar farið er fram á frekari bætur. "Það hefur verið sagt ítrekað við okkur að fara í mál ef við séum ekki sáttir. Það eina sem við viljum er að fá aftur þann kvóta sem var tekinn af okkur í upphafi. Annars geta þessar útgerðir sem enn tóra hætt baslinu. Gullið er horfið og ekkert eftir nema setja árar í bát enda er ég ekkert bjartsýnn á að ráðuneytismenn fari nú að sýna lit í málinu."