Vonast eftir bráðabirgðaleyfi

Verkefnisstjórn hótelsins í Eimskipafélagshúsinu vonast eftir bráðabirgðaleyfi til að hefja framkvæmdir við bygginguna þann tíunda september ef byggingaleyfi liggur ekki fyrir. Helgi S. Gunnarsson hjá VSÓ ráðgjöf segist ekki telja annað en að slíkt leyfi eigi að vera auðsótt. Byggingafulltrúi hefur bent framkvæmdaaðilum við hótelið á að það sé bannað að hefja framkvæmdir fyrr en byggingaleyfi liggur fyrir. Framkvæmdir áttu að hefjast tíunda september en vonast er eftir bráðabirgðaleyfi svo hægt verði að hefjast handa á tilsettum tíma. Eins og við sögðum frá í gær þarf húsafriðunarnefnd að koma að málinu, enda er ytra byrði hússins friðað sem og innréttingar á annarri hæð hússins. Helgi S. Gunnarsson hjá VSÓ ráðgjöf, sem hefur umsjón með verkefninu fyrir hönd eigenda, segir að ef tilskilin leyfi liggi ekki fyrir tíunda september verði sótt um bráðabirgðaleyfi. Hann segir að verkefnið hafi fengið meðbyr hjá borgaryfirvöldum og yfirstjórn skipulagsmála í borginni. Helgi segir eiganda hússins meðvitaðan um varðveislugildi og verðmæti þess. Ef niðurstaða húsafriðunarnefndar verði sú að ekki megi taka innréttingarnar niður verði skoðað alvarlega að láta þær halda sér og það komi ekki í veg fyrir hótelstarfsemi. Það sama sé að segja um sjö glugga sem gert er ráð fyrir á eldvarnarvegg viðbyggingar hússins frá 1975 sem snýr út í port. Viðbyggingin er hinsvegar einnig friðlýst, enda ekki greint á milli hennar og eldra hússins í friðlýsingu. Helgi segir að ef gluggarnir fáist ekki samþykktir, til að mynda vegna andmæla nágranna, komi það ekki í veg fyrir áætlanir um hótelið þótt notkunargildi hússins kunni að skerðast eitthvað. Sótt var um leyfi til að breyta notkun hússins í vor en ekki hafði verið sótt um byggingaleyfi síðast þegar fréttist fyrir viku. Nágrannar hafa frest til tíunda september til að skila inn athugasemdum vegna notkunarbreytingar jarðhæðar hússins. Ljóst er að bráðabirgðaleyfi til byggingaframkvæmda væri í andstöðu við verklag byggingafulltrúa sem var farið að framfylgja fimmtánda júní.