Þriðja óhappið á viku

Bíll í eigu Borgarverks, sama fyrirtækis og á vörubílinn sem fór fram af einbreiðri brú yfir Laxá í Dölunum, varð alelda rétt fyrir utan Stykkishólm í gærkvöld. Þá rann þriðji vörubíllinn í eigu fyrirtækisins út af vegi í Norðurárdal í síðustu viku.  Að sögn lögreglunnar á Stykkishólmi er talið að eldurinn hafi kviknað út frá vél bílsins. Tveir menn voru í bílnum og þeir stukku út þegar þeir urðu varir við reyk í stýrishúsi. Þeir sáu þá eld koma undan bílnum sem varð alelda á örskammri stund. Hjólaskófla á palli bílsins var einnig ónýt þegar slökkviliðið á Stykkishólmi kom á staðinn. Tveir bílar í eigu Borgarverks hafa því gjöreyðilögðast í sömu vikunni. Frumherji hefur skoðað bifreiðina sem valt út af brúnni í Dölunum en hún stóðst ekki aðalskoðun í apríl, meðal annars vegna athugasemda sem gerðar voru við hemlabúnað. Eigandinn fékk mánaðarfrest til að láta gera við búnaðinn en þegar slysið varð hafði ekki enn verið komið með bílinn í endurskoðun. Lögreglan í Búðardal segir þó að hemlabúnaður bifreiðarinnar hafi virst mjög nýlegur við fyrstu skoðun. Tæknistjóri ökutækjasviðs Frumherja vildi ekki staðfesta þetta í samtali við fréttastofu í dag en tók fram að ekki sé nóg að búnaður sé nýr heldur þurfi stillingar einnig að vera réttar. Kantur gaf sig svo undan þriðja bílnum í eigu Borgarverks en sá lenti utan vegar í Norðurárdal í síðustu viku. Borgarverk er fjölskyldufyrirtæki sem hefur verið með starfsemi í fjörutíu ár. Einn eigendanna, Óskar Sigvaldason, sagði í samtali við fréttastofu að fyrirtækið leigði út tólf bíla, þrjátíu tæki og hefði fjörutíu manns í vinnu. Hans segir tíðni óhappa á bifreiðum fyrirtækisins hafa verið lága, óhöppin undanfarið séu tilviljun ein og milidi að engin slys hafa orðið á fólki. Þá tók hann fram að bíllinn sem brann, sem og bíllinn sem lenti utan vegar í Norðurárdal, hafi verið með fulla skoðun.