Ónákvæm kort Landmælinga Íslands

Dæmi eru um að ár renni upp í mót og heilu og hálfu fjöllin vanti á landakort af Íslandi frá Landmælingum Íslands. Forstjóri stofnunarinnar kennir fjárskorti um. Arnar Sigurðsson hjá Loftmyndum ehf., sem gefið hafa út nákvæm kort sem unnin eru úr myndum teknum úr lofti, segir að nokkurt misræmi hafi komið í ljós þegar nýju kortin voru borin saman við stafræn kort Landmælinga. Hægt sé að finna skekkjur upp á nokkur hundruð metra og dæmi séu um að heilu og hálfu fjöllin vanti á kortin. Hann segir þetta stafa af því að gögnin sem Landmælingar notist við í kortagerð sinni séu gömul og ónákvæm. Arnar segir þau kort annars vegar byggð á gögnum frá tímum kortagerðar Dana hér á landi og hins vegar á gögnum frá bandaríska hernum.  Magnús Guðmundsson, forstjóri Landmælinga, segir að í sumum tilvikum sé um mannleg mistök að ræða. Starfsfólk Landmælinga taki því fagnandi þegar bent sé á villur í kortum til að hægt sé að laga þær. Hins vegar noti Loftmyndir mörg dæmi þar sem verið sé að bera saman ólíka hluti. Sumt sem sé vissulega rétt, t.a.m. að notast sé við gömul kort, en í öðrum tilvikum sé verið að bera saman mjög ólíka mælikvarða sem eru ekki samanburðarhæfir. Einfalt ferðakort sé t.d. ekki það sama og nákvæmt grunnkort og því beri að varast að bera þau saman. Magnús segir að fjárskortur sé aðal ástæða þess að ekki hafi öll gögn verið endurnýjuð og einnig að kortagerð sé kostnaðarsöm grein. Alltaf sé verið að endurnýja gögn og nefnir hann til að mynda verkefni sem hófst í dag þar sem hnitakerfi landsins, eða svokallað grunnstöðvanet, verður mælt upp á nýtt.