Fært til og frá Eyjum
Nokkur hundruð strandaglópar, sem skemmtu sér á þjóðhátíð í Vestmannaeyjum, komast líklega í land í dag, þar sem fært er orðið með flugi á ný. Hátt í 200 manns höfðust við í íþróttahúsinu í nótt. Ekki var hægt að fljúga frá Eyjum fyrr en í gærkvöldi en um miðnætti varð að aflýsa flugi aftur vegna þoku. Klukkan sjö í morgun átti að reyna á nýjan leik en fyrsta vél frá Flugfélagi Íslands fór ekki fyrr en klukkan hálftólf í morgun. Á áætlun í dag eru þær tvær vélar sem komust ekki yfir í gær, með um hundrað farþega samtals, og 19 sæta vél sem átti að fljúga í morgun. Ekki hefur verið ákveðið með fleiri ferðir hjá Flugfélagi Vestmananeyja. Hjá Flugfélagi Vestmannaeyjar hófst flug uppá Bakka klukkan hálfellefu í morgun. Þar á bæ er reiknað með að um klukkan fjögur eða fimm verði búið að koma þeim 250 farþegum sem beðið hafa, uppá land. Fullt var með Herjólfi í nótt. Um hálftíma seinkun varð á ferð skipsins í morgun vegna anna og lagðist það að bryggju rétt fyrir hádegi. Herjólfur fer seinni ferð í dag og loks næturferð í nótt.
