Skotmaður ekki fundinn enn

Maðurinn sem skaut með haglabyssu á tvö hús að Reykhólum í Barðastrandasýslu hefur ekki fundist enn. Lögregla veit hver var að verki en maðurinn hafði yfirgefið umdæmið þegar hún kom á staðinn, rúmlega átta klukkustundum síðar. Þórólfur Halldórsson, sýslumaður á Patreksfirði segir enga skipulega leit standa yfir, en lögregla um land allt er með boð um að hafa augun hjá sér og handtaka manninn ef til hans sést. Hann segir enga ástæðu til að ætla að almenningi stafi ógn af manninum. Maðurinn var í annarlegu ástandi, segir Þórólfur, og ekki er vitað hvað honum gekk til.