Náði að rekja sér leið til baka

Björgunarsveitir á Austurlandi voru kallaðar út um klukkan hálfellefu í gærkvöldi til að leita að konu sem hafði orðið viðskila við gönguhóp í þoku inn við Borgarfjörð Eystri. Konan náði að rekja sér leið tilbaka og kom í leitirnar tæpum klukkutíma síðar. Hópurinn var á göngu frá Borgarfirði Eystri yfir í Vatnsdal. Klukkan sex í gærkvöldi var ljóst að konuna vantaði en hópurinn hélt áfram yfir í Vatnsdal í þeirri von að hún skilaði sér þangað. Það gerði hún hins vegar ekki og var þá óskað eftir aðstoð björgunarsveita og voru allar sveitir á Austurlandi settar í viðbragðsstöðu. Um tuttugu björgunarsveitarmenn úr tveimur sveitum Slysavarnafélagsins Landsbjargar voru sendir strax til leitar. Eins og áður segir fannst konan heil á húfi skömmu síðar en hún hafði ratað tilbaka á byrjunarreit gönguleiðarinnar, í Borgarfirði Eystri. Veður var ágætt en mikil þoka.