Ein líkamsárás á Akureyri
Tilkynnt var um eina líkamsárás á Akureyri í nótt að sögn lögreglu. Maður nefbrotnaði og missti nokkrar tennur, þegar hann var barinn með barefli. Þá komu upp 15 fíkniefnamál á Akureyri í nótt, mest minni háttar mál, þar sem lögregla gerði upptæk nokkur grömm af amfetamíni eða hassi til einkaneyslu. Alls hafa nú komið upp 46 fíkniefnamál á Akureyri síðan á fimmtudaginn, en í öllum tilvikum utan þremur hefur verið um minni háttar tilvik að ræða. Líkamsárásin í nótt er hins vegar sú fyrsta sem kærð er til lögreglu og engar tilkynningar um nauðganir hafa borist henni. Lögreglan á Akureyri segir hátíðina hafa farið vel fram og það eina sem skyggi á sé hve mörg fíkniefnamál hafa komið upp.
