Fjölmennasta útihátíðin friðsamleg

Lögreglan á Akureyri er í sjöunda himni yfir hátíðinni "Ein með öllu" sem haldin er í bænum. Ekki hefur verið tilkynnt um líkamsárásir, óspektir, nauðganir eða önnur ofbeldisverk til lögreglunnar um helgina þrátt fyrir að hátt í 15 þúsund gestir séu í bænum. Veðrið hefur leikið við hátíðargesti á Akureyri alla verslunarmannahelgina. Það mátti vart á milli sjá hvor brosti breiðar, sólin eða lögreglan. Það má segja að það sé af sem áður var, þegar útihátíðum á Akureyri fylgdi ramakvein lögreglu yfir hegðan ölvaðs fólks um allan bæ. Ólafur Ásgeirsson, yfirlögregluþjónn, telur eina skýringu líklegri en aðrar á þeirri breytingu sem orðið hefur á yfirbragði hátíðahaldanna. Hann segir að mun meira sé af fjölskyldum á hátíðinni nú en áður og unglingar séu í minnihluta.