Ísland fær svigrúm í samningum

Stefán Haukur Jóhannesson, formaður samninganefndar innan Alþjóðaviðskiptastofnunarinnar, segir vilja og svigrúm innan stofnunarinnar til að tryggja undanþágur fyrir Ísland og önnur ríki með viðkvæman landbúnað. Hann segir það létti að nú liggi markmið fyrir. Stefán Haukur Jóhannesson, sendiherra Íslands í Genf, er formaður samninganefndar Alþjóðaviðskiptastofnunarinnar, um markaðsaðgang fyrir iðnaðarvörur. Hann hefur fundað stíft að undanförnu, og meðal annars stýrt langri samningalotu. Stefán Haukur fagnar því að nú hafi tekist að ná sátt um landbúnaðarþátt viðræðnanna, því það hafi orðið til þess að tryggja pólitískt samkomulag. Viðræður um þessi mál höfðu verið strand í þrjú ár. Iðnaðarríkin og þróunarlöndin tókust hart á, í samningaviðræðum um iðnaðarvörur, en Stefán Haukur bendir á að nú hafi náðst samningar, sem allir geti sætt sig við. Hann segir að alveg eigi eftir að fylla inn í þann ramma sem náð var sátt um núna og of snemmt að segja hvaða áhrif hann kemur til með að hafa. Hann segir ákveðinn létti að komin séu ákveðin markmið þannig að vitað er að hverju er stefnt. Það sé mikið svigrúm fyrir ríki eins og Ísland og því ekki ástæða til að hafa of miklar áhyggjur af þessu að svo stöddu. Þetta eigi allt eftir að taka tíma og Íslendingar muni hafa sveigjanleika í þeim reglum sem verið sé að semja um.