Fjöldi á unglingalandsmóti

Tíu þúsund manns eru á unglingalandsmóti UMFÍ á Sauðárkróki um helgina. Þar brosa skipuleggjendur hringinn og þakka fyrir góða gesti og gott veður. Það hefur ekki verið eintómt sólskin á Sauðárkróki um helgina en það hefur ekki komið að sök. Vaskir unglingar hafa keppt af kappi í hinum ýmsustu íþróttagreinum, og foreldrarnir að sögn skemmt sér hið besta í klappliðinu. Mótið hefur að sögn lögreglu og aðstandenda gengið afskaplega vel og án teljandi vandræða. Í kvöld munu hljómsveitir skemmta og má búast við miklu fjöri en staðhæft er að allir hafi verið farnir að sofa skömmu eftir miðnætti í gær. Björgunarsveitir slá eins konar skjaldborg utan um tjaldsvæði þátttakenda á unglingalandsmótinu og fjölskyldna þeirra á kvöldin til að tryggja að allir fái að vera í friði á nóttinni.