Egó í kvöld

Hljómsveitin Egó er komin til Vestmannaeyja og var með hljóðprufu um fjögurleytið. Stórt hljóðkerfi hefur verið sett upp við sviðið í dalnum og hlakka menn til að heyra Egó vakna af 20 ára dvala, að sögn Páls Schevings framkvæmdastjóra hátíðarinnar. Hann segir sumargolu leika um gesti sem eru nú um 9000. Loftbrú er komin á milli lands og Eyja og Herjólfur kom síðla dags með nærri fullt skip. Búist er við að nokkuð fjölgi í dalnum á morgun. Þess má geta að Gróa á leiti hefur séð leikarana Sean Connery og Colin Farrell bregða fyrir í dalnum, þetta er þó algerlega óstaðfest.