Rjómablíða í Eyjum

Rjómablíða er í Vestmannaeyjum í dag eftir rigningu í nótt og gærdag. Dagskráin stóð til klukkan fimm í nótt og fór að sögn ágætlega fram, en þrátt fyrir rigningu var mikil stilla í dalnum. Töluvert margir eru saman komnir í Herjólfsdal og segja vanir þjóðhátíðargestir fleiri vera þar nú en í fyrra en þegar eru komnir 8000 manns á svæðið. Því er spáð að gestir verði um 9-10 þúsund á sunnudagskvöldið, svo framarlega að flugsamgöngur verði í lagi. Í kvöld stígur hljómsveitin Egó á stokk með Bubba Morthens í fararbroddi. Að vonum er mikil eftirvænting að fá að sjá þessa rokkara ganga í endurnýjun lífdaga.