Leit formlega hætt

Flest þykir nú benda til að misheppnaður grínisti hafi sent hundruð björgunarsveitarmanna í tilgangslausa leit að hópi tuttugu franskra ferðamanna á hálendinu. Starfsmaður Ferðafélagsins gerði Neyðarlínunni viðvart að morgni fimmtudags eftir að maður hafði komið inn í samtal hans og skálavarðar í Hvanngili um talstöð. Sagði maðurinn ferðamennina hafa veikst eftir að hafa borðað kjúkling en sambandið á að hafa rofnað áður en maðurinn náði að gefa upp deili á sér eða staðsetningu hópsins. Umfangsmikil leit fór af stað og var óskað eftir aðstoð þyrlu landhelgisgæslunnar. Enginn hefur kannast við að hafa skipulagt ferð þessa ferðahóps né heyrt af ferðum hans. Þá hefur leitin engan árangur borið. Upplýsingar sem maðurinn gaf í símtalinu hafa reynst rangar og hefur nú leit verið formlega hætt. Skipuleggjendur leitarinnar hafa þó ekki viljað trúa því að þeir hafa verið sendir í tilgangslausa leit og óska enn eftir upplýsingum um þennan ferðahóp og eru reiðubúnir til að halda leit áfram komi fram nýjar vísbendingar. Ef þetta reynist hafa verið gabb er það afar alvarlegt mál því ljóst er að kostnaður við leitina hleypur á milljónum og þá er líka rétt að taka tillit til þess tíma sem sjálfboðaliðar úr hópi björgunarsveitarmanna hafa eytt í leitina.