Góð afkoma hjá Burðarási

Fjárfestingarfélagið Burðarás, móðurfélag Eimskipafélagsins hagnaðist um tæpa sjö milljarða á fyrri helmingi ársins sem er meiri hagnaður en nokkurt fyrirtæki hefur skilað á fyrri helmingi ársins. Hagnaður annars ársfjórðungs var rúmir tveir milljarðar króna. Eimskipafélagið hefur sett sér metnaðarfull markmið um betri afkomu. Baldur Guðnason forstjóri Eimskipafélagsins boðar vöxt og betri nýtingu fjárfestinga félagsins. "Markmiðið er að auka arðsemi félagsins um yfir milljarð króna á næstu tveimur árum og að félagið vaxi um 40 til 50 prósent." Burðarás kynnti samhliða uppgjörinu stefnumótun sína. Markmið félagsins er að fjárfesta að stærstum hluta, eða um 65 prósent í óskráðum félögum, innlendum og erlendum. Þá stefnir Burðarás að því að um fimm prósent heildareigna verði í nýsköpunarfyrirtækjum. Friðrik Jóhannsson segir að þær fjárfestingar verði að mestu hérlendis. "Ekki vegna þess að við séum svo þjóðernissinnuð, heldur eru þetta fjárfestingar sem krefjast þess að maður sé vakinn og sofinn yfir þessum fjárfestingum." Uppgjörið og stefna Burðaráss fór vel í markaðinn og hækkuðu bréf félagsins um tíu prósent í gær