Loftbrú milli lands og Eyja

Loftbrú hefur nú verið komið á, milli lands og Eyja, þar sem flugfært er orðið til Vestmannaeyja að nýju. Þegar hafa nokkrar vélar farið frá Reykjavíkurflugvelli, en samkvæmt áætlun fara ellefu vélar þaðan í dag með gesti á þjóðhátíð, alls um 400 manns. Þá er ennfremur orðið flugfært frá Bakkaflugvelli í Landeyjum, og verður væntanlega flogið þaðan fram á kvöld. Herjólfur kom með um 500 manns til Vestmannaeyja klukkan kortér í fjögur í dag og er nú á leiðinni til Þorlákshafnar. Áætluð er önnur ferð skipsins til Eyja um klukkan átta á kvöld. Þjóðhátíðin í Vestmannaeyjum var sett formlega klukkan hálfþrjú í dag og var að sögn vel mætt í Herjólfsdal, eða á bilinu tvö til þrjú þúsund manns. Fjölbreytt dagskrá verður í kvöld en hámarkinu verður væntanlega náð með brekkusöng Árna Johnsens á sunnudagskvöld. Búist er við, að allt að 8000 manns verði á þjóðhátíðinni í Eyjum um helgina. Að sögn Umferðarstofu hefur verið talsverður umferðarþungi á leiðinni til Akureyrar, enda ljóst að margir elta góða veðrið, sem spáð er norðanlands um verslunarmannahelgina. Búist er við fjölmenni á fjölskylduhátíðinni, Einni með öllu, á Akureyri. Af því tilefni verður hámarksviðbúnaður við tjaldsvæði bæjarins og verður því fylgt strangt eftir, að þangað komi engin ungmenni undir 18 ára aldri, nema í fylgd með forráðamönnum.