Fært í flug til Eyja

Fært er orðið flugleiðis til Vestmannaeyja, en ekkert hefur verið flogið til Eyja frá því í gær, sökum veðurs. Tvær vélar eru nú farnar í loftið frá Reykjavíkurflugvelli, en samkvæmt áætlun fara 11 vélar í dag með gesti á þjóðhátíðina í Vestmannaeyjum. Bæði Flugfélag Íslands og Íslandsflug fljúga frá Reykjavík til Eyja með um 400 manns í dag. Þá fór ein vél með þjóðhátíðargesti frá Bakkakotsflugvelli í Landeyjum fyrir stundu. Herjólfur lagði af stað frá Þorlákshöfn í hádeginu í dag. Sjólag er heldur leiðinlegt, að sögn skipstjóra, en búist er við að skipið komi til Vestmannaeyja um fjögurleytið. Það leggur svo í aðra ferð frá Þorlákshöfn klukkan hálfátta í kvöld.