Þjóðverji í farbann

Erlendur karlmaður sem slasaðist mikið þegar hann kastaðist út úr bíl sem valt á Vatnsskarði á Krísuvíkurvegi á laugardagskvöldið var, lést á gjörgæsludeild Landspítalans í gær. Ökumaður bílsins hefur verið úrskurðaður í farbann, grunaður um manndráp af gáleysi. Hinn látni, sem hét Frank Wetke, iðnaðarmaður búsettur í þýskalandi og var hann ásamt fjórum öðrum iðnaðarmönnum í bílnum. Hann komst aldrei til meðvitundar eftir slysið. Ferðafélagar hans sluppu lítið meiddir en mennirnir eru staddir hér á landi vegna tímabundinna starfa. Ökumaður bílsins var í gær úrskurðaður í Héraðsdómi Reykjaness í fjögurra vikna farbann að kröfu rannsóknalögreglunnar í Hafnarfirði og mun væntanlega gefa skýrslu þegar málið fer fyrir dóm að rannsókn lokinni. Hann er grunaður um ölvunarakstur, en mennirnir höfðu haldið teiti við Svartavatn við Krísuvíkurveg, og sumir að minnsta kosti drukkið bjór ótæpilega, og voru þeir á heimleið þegar bíllinn valt. Blóðsýni voru tekin úr þeim öllum eftir slysið. Hinir mennirnir, sem voru í bílnum, gáfu allir skýrslu fyrir dómi í gær og eru frjálsir ferða sinna.