Víðtæk leit að 20 ferðamönnum

Óttast var um hóp tuttugu ferðamanna í gær eftir að neyðarkall kom í gegnum samtal á milli Ferðafélags Íslands í Reykjavík og skálavarðar í Hvanngili. Björgunarsveitir á Suðurlandi héldu af stað á hálendið á öðrum tímanum í gær. Ekkert var vitað um hópinn þegar blaðið fór í prentun í gærkvöldi. Hjálparbeiðnin barst frá Íslendingi sem sagðist vera með tuttugu manna hóp franskra ferðamanna sem allir væru orðnir meira eða minna veikir. Var talið að um matareitrun væri að ræða. Engar staðsetningar komu fram um hvar hópurinn væri niðurkominn. Beiðnin barst um rás Ferðafélags Íslands í samtali félagsmanns í Reykjavík við skálavörð í Hvanngili. Ferðafélagsmaðurinn í Reykjavík heyrði kallið en skálavörðurinn ekki. Þá heyrðu leiðsögumaður við Nýjadal og áhugamaður í Reykjavík einnig kallið en þeir voru með stillt á rásina sem kallið kom um. Björgunarsveitir frá Hellu, Hvolsvelli, Landeyjum og Álftaveri hófu leitina. Frá Rangárvallasýslu fóru um fjörutíu leitarmenn á sjö bílum. Að sögn Svans Lárussonar, formanns Flugbjörgunarsveitarinnar á Hellu, var farið í alla skála sem ekki eru skálaverðir í frá Kerlingafjöllum og inn að Snæfelli. Auk þess var haft samband við alla skálaverði á svæðinu og alla ferðaþjónustuaðila en enginn kannaðist við hópinn. Svanur segir kallið hafa komið um endurvarpa á Háskerðing sem er fyrir sunnan Hrafntinnusker. Gallinn sé þó að endurvarpinn skanni gríðarlega stórt svæði. Í gærkvöldi voru hópar ekki farnir að ganga en til þess verður að hafa einhverja staðsetningu til að miða við. Ekki er hægt að útiloka að um gabb hafi verið að ræða þó kunnáttumenn telji það ólíklegt.