Sauma þurfti 56 spor í hálsinn

"Ég fattaði ekki strax að ég hefði bókstaflega verið skorinn á háls. Ég er að byrja að taka út áfallið, rétt að átta mig á að þetta hafi gerst. Skurðurinn er sextán sentímetra langur og það voru saumuð 56 spor," segir Ásgeir Elíasson leigubílstjóri þegar Fréttablaðið ræddi við hann í gær. En 48 ára maður, sem hann ók, skar hann á háls á Vesturgötu í fyrrinótt þegar kom að greiðslu fargjaldsins. Ásgeir segir skurðinn hafa verið djúpan og að sauma hafi þurft í gegnum þrjú húðlög, æðar og annað fyrir innan húðina hafi sést og að nær engu hefði mátt muna að mikið verr færi. "Ég skil ekki að menn skuli gera svona lagað vegna 1.950 króna, því þeir rændu mig ekki," sagði Ásgeir. Kærasta Ásgeirs, Jóna Dís Þórisdóttir, sagði árásina vera mikið áfall sem erfitt sé að takast á við en það muni hafast með tímanum. Ásgeir útskrifaðist af sjúkrahúsi um hádegi í gærdag. Ásgeir var að aka fjórum mönnum á Vesturgötu og átti einn þeirra að greiða fargjaldið. Ásgeir sat inni í leigubílnum en mennirnir voru allir komnir út þegar Ásgeir fann allt í einu hita um hálsinn. Einn fjórmenninganna, 48 ára maður, var í gær úrskurðaður í gæsluvarðhald til 4. ágúst. Farið var fram á gæsluvarðhaldið vegna alvarleika árásarinnar. Mennirnir sem eru fæddir frá árinu 1947 til 1956 voru allir undir áhrifum vímuefna. Þeir hafa áður komið við sögu lögreglu og er þekktir fyrir óreglu. Ómar Smári Ármannsson, aðstoðaryfirlögregluþjónn í Reykjavík, segir málið mjög alvarleg og það verði rannsakað sem slíkt. Þá segir hann bæði leigubílstjórann og árásarmanninn mjög heppna að ekki skyldi fara verr því litlu hefði munað.