5 ára fangelsi fyrir e-töflu smygl

Héraðsdómur Reykjaness dæmdi í dag 26 ára konu í fimm ára fangelsi fyrir að reyna að smygla rúmlega 5 þúsund e-töflum inn í landið. Konan, sem heitir Fanta Sillah og er frá Afríkuríkinu Síerra Leóne, var stöðvuð í Leifsstöð þann 10. júní sl. og fundust töflurnar í bakpoka hennar.  Konan neitaði sök og sagðist ekki vita hvernig fíkniefnin hefðu komist í farangur sinn en fjölskipaður héraðsdómur taldi það hafið yfir allan skynsamlegan vafa að konan hafi vitað að e-töflurnar voru falin í bakpoka hennar. Hin dæmda er komin um 7 mánuði á leið og var flutt á sjúkrahús í gærkvöldi vegna erfiðleika sem fylgt hafa meðgöngunni. Í niðurstöðum dómsins segir að ekkert liggi fyrir um það að konan hafi ætlað að taka þátt í sölu og dreifingu fíkniefnanna á Íslandi með öðrum hætti en þeim að flytja þau til landsins. Refsing sé því miðuð við að hún hafi verið að þjóna hagsmunum annarra brotamanna sem burðardýr. Þá segir að við ákvörðun refsingar þyki einnig mega líta til þess að ekkert liggur fyrir um að konan hafi áður gerst sek um refsiverða háttsemi. Á hinn bóginn verði ekki litið framhjá eðli og alvarleika brotsins, um umtalsvert magn af mjög hættulegum fíkniefnum sé að ræða og konan eigi sér engar málsbætur. Fanta Sillah var að koma frá Frakklandi en ferðaðist til Íslands á hollensku vegabréfi. Hún er með skráð heimili í Hollandi ásamt kærasta sínum og tæplega fimm ára barni sem hefur verið komið fyrir í umsjá hollenskra barnaverndaryfirvalda. Samkvæmt upplýsingum frá Interpol er hún ekki á sakaskrá þar í landi. Sillah greindi frá því við yfirheyrslur að hún væri vændiskona og samkvæmt upplýsingum frá lækni í Hollandi hefur hún tvívegis farið í fóstureyðingu þar. Eins og áður segir er hún nú barnshafandi og á von á sér í október.  Til frádráttar fimm ára fangelsinu koma 43 dagar sem hún hefur setið í gæsluvarðhaldi.