Löggæslukostnaður komi frá ríkinu

Geir Jón Þórisson yfirlögregluþjónn telur að aðstandendur árvissra viðburða og útihátíða með menningar- og sögulegt gildi eigi ekki að standa straum af tilfallandi löggæslukostnaði. Kostnaður vegna löggæslu í Vestmannaeyjum um verslunamannahelgi hefur verið tvær til þrjár milljónir síðastliðin ár. Löggæslukostnaður hátíðarinnar Einnar með öllu á Akureyri er enginn þó þar sé von á þúsundum manna um verslunarmannahelgina, með tilheyrandi álagi á löggæslu því hátíðin þarf ekki skemmtanaleyfi frá lögreglustjóra. Samkvæmt lögum er lögreglustjórum heimilt að binda skemmtanaleyfi því skilyrði að lögreglumenn verði á skemmtistað og leyfishafi greiði kostnað af því. Þegar um viðburði sem ekki kalla á útgáfu skemmtanaleyfis er ekki hægt að rukka þann sem stendur að atburðinum fyrir löggæslukostnað, þrátt fyrir hann falli sannarlega til. Ef sú staða kemur til dæmis upp að löggæslukostnaður verði meiri á Akureyri en í Vestmannaeyjum, verður hann greiddur úr ríkissjóði. Þetta þykir aðstandendum Þjóðhátíðar í Eyjum súrt í broti. Geir Jón segist skilja áhyggjur aðstandenda útihátíða og telur að það sé hægt að fara aðra leið við innheimtu löggæslukostnaðar. "Ég geri greinarmun á hátíðum sem hafa langa hefð og eru árviss viðburður og þeim sem eru haldnar í eitt skipti í von um skyndigróða. Ef vitað er af árvissum viðburði á ákveðnu svæði má skipuleggja fjárheimildir lögreglunnar í ljósi þess svo hægt sé að bregðast við löggæsluþörfinni." Geir Jón telur þetta auk þess stuðla að vönduðum undirbúningi útihátíða sem verði síður fýsilegur kostur sem fyrirtæki til skyndigróða. Stefán Eiríksson hjá dóms- og kirkjumálaráðuneyti segir mikilvægt að hafa í huga að núverandi fyrirkomulag sé í samræmi við skýr ákvæði lögreglulaga. Hann segir að það megi velta fyrir sér ýmsum breytingum á þessu fyrirkomulagi eins og Geir Jón leggur til, en það kalli á lagabreytingar og fram að því verði að fara eftir gildandi lögum.