Stórt skref tekið í hvalveiðimálum

Stefán Ásmundsson, formaður íslensku sendinefndarinnar á ársfundi Alþjóðahvalveiðiráðsins í Sorrento á Ítalíu, segir að stórt skref hafi verið stigið í rétta átt á fundinum með þeirri ákvörðun að stefnt yrði að því að ljúka við endurskoðun á veiðistjórnunaráætlun fyrir ársfundinn sem haldinn verður í Suður-Kóreu á næsta ári. Andstæðingum hvalveiða tókst að koma í veg fyrir samþykki ályktunar þessa efnis en lögð var fram tillaga um að fleiri kæmu að vinnunni við áætlunina. Bandaríkjamenn studdu ásamt Íslendingum, Norðmönnum og Japönum tillögu um að endurskoðun á veiðistjórnunaráætlun yrði lokið fyrir næsta ársfund ráðsins, en eins og fyrr segir munu fleiri koma að þeirri endurskoðun. Stefán segir að þessi niðurstaða undirstriki einhverja mestu einingu í Alþjóðahvalveiðiráðinu um árabil. Eftir sem áður séu ríki innan ráðsins sem eru harðir andstæðingar hvalveiða en hluti þeirra hefur opnað augun fyrir því að bann við hvalveiðum er ekki að skila tilætluðum árangri. Norðmenn stundi t.d. hvalveiðar í atvinnuskyni og aðrar þjóðir séu að hugleiða slíkt hið sama þrátt fyrir bannið. Stefán segir viðhorf aðildalanda ráðsins því farið að hneigjast að því að betra sé að aflétta banninu svo menn stundi hvalveiðar undir stjórn Alþjóðahvalveiðiráðsins, frekar en eftirlitslaust.  Hægt er að hlusta á viðtal við Stefán Ásmundsson, formann íslensku sendinefndarinnar, úr fimmfréttum Bylgjunnar með því að smella á hljóðhlekkinn hér að neðan. Einnig er hægt að horfa á frétt Stöðvar 2 um málið með því að smella á myndhlekkinn hér að neðan.