Sundgarpur í borginni

Rétt fyrir sjö í gærmorgun var lögreglunni í Reykjavík tilkynnt um mann sem hafði hent sér í sjóinn við Reykjavíkurhöfn. Samferðarmenn sundkappans létu lögreglu vita og mætti lögregla á Olís-stöð við Sæbraut til að tala nánar við fólkið. Maðurinn hafði þá hent sér út í sjó á þeim forsendum að hann ætlaði að synda til Viðeyjar. Björgunarbátur lögreglunnar var settur í gang og neyðaráætlun framkvæmd til að ná í manninn. Þegar björgunarbátur náði manninum var hann kominn út í Engey. Maðurinn var ekki fluttur á sjúkrahús og virtist hann vera í góðu lagi að sögn lögreglu. Maðurinn gaf enga aðra ástæðu fyrir þessu uppátæki sínu og hann var allsgáður.