Óvissa um stjórnsýsluhús

Enn hefur ekki verið tekin ákvörðun um byggingu stjórnsýsluhúss á Keflavíkurflugvelli. Málið hefur síðustu mánuði verið til umræðu innan utanríkis- og fjármálaráðuneytis en utanríkisráðuneytið hefur forræði yfir málinu. Þetta kemur fram á vef Víkurfrétta. Í stjórnsýsluhúsinu verða sýslumannsembættið á Keflavíkurstjórn og embætti flugvallarstjóra en sýslumannsembættið hefur átt við verulegan húsnæðisvanda að stríða síðustu misseri. Komið hefur verið upp gámum við lögreglustöðina að Grænás sem hýsa skrifstofur embættisins. Áætlaður byggingakostnaður stjórnsýsluhússins er á bilinu 800 til 1000 milljónir króna. Hjálmar Árnason alþingismaður segir að unnið hafi verið lengi og vel að málinu en að fjárheimild hafi ekki fengist. „Það er búið að undirvinna málið að öllu leyti. Fjármálaráðuneytið hefur fallist á forsendurnar fyrir stjórnsýsluhúsinu en einungis stendur eftir að taka ákvörðun um að fara í framkvæmdir og ég trúi að það muni gerast við næstu fjárlagagerð.“ Aðspurður sagði Hjálmar þörfina á stjórnsýsluhúsinu vera til staðar; flugumferð sé vaxandi og mikil þrengsli og aðstöðuleysi sé hjá lögreglumönnum embættisins. „Það er auðvitað óþolandi hvað búið er að draga málið og að fjárheimildir fáist ekki eftir alla þá góðu og faglegu vinnu sem búið er að vinna af hálfu sýslumannsembættisins. Það er allt sem mælir með því að húsið verði byggt og ég sé engin rök gegn því,“ sagði Hjálmar í samtali við Víkurfréttir.