Fötluð börn í áhættuhópi

Bragi Guðbrandsson, forstöðumaður Barnaverndarstofu, telur fagnaðarefni ef farið verður ofan í saumana á málefnum heyrnarlausra barna. Félag heyrnarlausra hefur kallað eftir opinberri rannsókn á kynferðisbrotum gegn heyrnarlausum börnum þar sem rökstuddur grunur hafi komið fram um að stór hópur hafi verið misnotaður kynferðislega. Þá hafi norsk rannsókn leitt í ljós að fjórða hvert heyrnarlaust barn hafi mátt sæta kynferðisofbeldi. "Rannsóknir víða erlendis hafa sýnt að fötluð börn eru í sérstökum áhættuhópi þar sem þau eru almennt séð varnarlausari en önnur börn," segir Bragi Guðbrandsson. "Kynferðisbrotamenn eru fundvísir á fórnarlömb og velja þau oft á tíðum af mikilli kostgæfni, gjarnan með tilliti til þess að lágmarka hættuna á því að upp um þá komist. Þá verða fatlaðir einstaklingar oft fyrir valinu þar sem tjáning þeirra er hömluð með einum eða öðrum hætti." Bragi segir menn hafa verið meðvitaða um þessa hættu lengi. "Menn þurfa alltaf að vera vakandi fyrir því að beina sjónum sínum einkum að þessum börnum og hvað er hægt að gera til þess að tryggja öryggi þeirra." Héraðsdómur Reykjaness dæmdi í vikunni heyrnarlausan mann fyrir kynferðisbrot gegn tveimur dætra sinna. Við ákvörðun dómsins var tekið tillit til kynferðislegrar misnotkunar sem dæmdi mátti sæta í æsku og hlaut hann því vægari dóm en ella. Þá tók dómurinn fram að svo virtist sem að nokkuð margir heyrnarlausir einstaklingar hefðu verið misnotaðir á því tímabili. Bragi segir málið mjög viðkvæmt, einkum í ljósi þess að samfélag heyrnarlausra á Íslandi telji ekki mjög marga einstaklinga. Því sé erfitt að halda leyndu hver í hlut eigi. "Engu að síður er eðlilegt að umfjöllun verði í samfélaginu í tengslum við þessi mál, sérstaklega um hvað við getum gert til þess að vernda þessi börn."