Grjótregn í Reykjavík

Skæðadrífa grjóthnullunga kastaðist yfir húsið við Borgartún 7, þar sem m.a. Ríkiskaup og Vegagerðin eru til húsa, þegar sprengt var fyrir grunni í götunni. Þetta er í annað sinn á stuttum tíma sem starfsmenn ríkis og borgar fá grjóthnullunga úr grunninum inn á borð til sín. Sprengistjórinn segir þetta mistök. Fyrir um tveimur vikum átti byggingafulltrúi Reykjavíkurborgar fótum fjör að launa þegar sama fyrirtækið, Jarðvélar, var að sprengja fyrir grunninum á lóðinni við Borgartún. Þá kastaðist grjót inn um glugga á skrifstofum skipulags og byggingarsviðs borgarinnar sem eru við Borgartún 5 . Í þetta skipti var krafturinn svo mikill að grjótið kastaðist yfir 100 metra - úr grunninum og yfir götuna - og náði að dælda bifreið og mölva sjö rúður í húsinu við Borgartún 7. Engin slys urðu á fólki en þó nokkrir voru í byggingunni þegar sprengingin varð. Óskar Borg, markaðsstjóri Ríkiskaupa, var þar á meðal og segir hann húsið hafa nötrað og hávær brothljóð borist honum til eyrna. Þegar hann fór að athuga hvað væri á seyði mætti honum hrúga af grjóti í anddyri byggingarinnar.   Bjarni Kristjánsson, sprengistjóri hjá Jarðvélum, segir aðspurður hvorki um óheppni né klaufaskap að ræða heldur ranga útreikninga. Klöppin, sem um sé að ræða, sé líka „erfið“.  Bjarni segir að 20 til 25 kíló af sprengiefni hafi verið sprengd þegar motturnar gáfu sig og grjótið tókst á flug. Í fyrra skiptið var málið sent til athugunar hjá yfirverkfræðingi og byggingafulltrúi átaldi fyrirtækið fyrir að hafa ekki lokað umferð um götuna áður en hafist var handa við að sprengja. Sprengistjórinn segir þá bíða eftir því að öll umferð - gangandi og akandi - fari af götunni áður en sprengt er. Svo hafi einnig verið í þessu tilviki. Þess má geta að framkvæmdir við grunninn eru á byrjunarstigi og fyrir er heilmikil klöpp sem enn á eftir að sprengja burt.