Flugstöð Leifs Eiríkssonar stækkar

Nýr þúsund fermetra innritunarsalur var formlega tekinn í notkun í Flugstöð Leifs Eiríkssonar í dag. Nýi salurinn verður bylting fyrir farþega og starfsfólk í flugstöðinni að sögn Höskuldar Ásgeirssonar, forstjóra flugstöðvarinnar. Hann segir salinn skapa gjörbreytta aðstöðu fyrir flugafgreiðsluaðila og þjónustan við farþega verði um leið betri. Framkvæmdirnar hófust í janúar sl. og lauk á tilsettum tíma. Starfsumhverfi bílaleigufyrirtækja hefur einnig verið verulega bætt við komuhlið. Bílastæðum var fjölgað um 500 við austurhlið flugstöðvarinnar og aðkomuleiðum breytt. Halldór Ásgrímsson utanríkisráðherra var að vonum ánægður eftir að hann hafði klippt á borðann. Hann segir flugfarþegum sem leið eigi um flugstöðina að fjölga og því mikil uppbygging og framfarir að eiga sér stað á flugvellinum. Halldór segir fleiri störf vera að skapast á staðnum sem sé mjög jákvætt, sérstaklega í ljósi þess að störfum sé að fækka hjá hernum.