Skipulagsbreytingar á Eimskipum

Unnið er að skipulagsbreytingum á Eimskipum sem meðal annars miða að því að samtvinna TVG-Zimsen og Flytjanda inn í heildarstarfsemi félagsins. Búið er að kynna starfsmönnum ramma að breytingum, sem nú er verið að útfæra nánar og eru allir fjórir aðalþættir félagsins undir. Þeir eru sjóflutningar milli Íslands og útlanda, landflutningar, flutningsmiðlun og vörustjórnun og erlend starfssemi. Nánar vilja starfsmenn félagsins ekki fara út í skipulagsbreytingarnar að svo stöddu. Fréttastofunni er kunnugt um að starfsmen félagsins óttist að mörgum verði sagt upp í kjölfar breytinganna en ekkert fæst staðfest um það. TVG-Zimsen er flutningamiðlunarfyrirtæki og Flytjandi er einskonar vörumerki sem bílar Eimskips og nokkurra einstaklinga aka undir. Ekkert liggur fyrir um það hvenær breytingarnar eiga að taka gildi en þær miða að því að styrkja starfsemi félagsins, eins og eigendur orða það. Í fjármálaheiminum benda menn á að með því að skýra rekstrarþættina betur og þjappa þeim saman verði auðveldara að selja félagið, en það er að meirihluta í eigu Landsbankans.