Gæsluvarðhald móður framlengt

Héraðsdómur Reykjavíkur framlengdi í gær gæsluvarðhaldsúrskurð yfir móður sem grunuð er um að hafa banað dóttur sinni og sært son sinn með hnífi.  Konan var úrskurðuð í tveggja vikna gæsluvarðhald sem rann út í gær og var það framlengt um þrjár vikur, eða til 5. júlí. Konan er enn á sjúkrahúsi en yfirheyrslur yfir henni hafa tafist vegna veikinda hennar. Þegar heilsa konunnar verður betri verður hún flutt til gæslu á réttargeðdeildinni að Sogni en henni var einnig gert að gangast undir geðrannsókn. Útför dóttur konunnar var gerð í gær frá Fossvogskirkju en sonur konunnar, sem særðist illa, hefur verið útskrifaður af sjúkrahúsi og dvelst hjá ættingjum. Eins og fram hefur komið er konan grunuð um að hafa lagt til barna sinna á meðan þau sváfu og sært sjálfa sig á eftir. Syni konunnar tókst að komast út úr íbúðinni og hlaupa nokkur hundruð metra leið að fjölbýlishúsi við Kaplaskjólsveg, þar sem hann þekkir til, og gera viðvart.