Fíkniefni og vopn í Þorlákshöfn

Lögreglan á Selfossi réðst til inngöngu í einbýlishús í Þorlákshöfn í gærmorgun. Við húsleit fannst nokkuð magn fíkniefna og búnaður til sölu þeirra. Einnig fundust skotvopn, skotfæri og önnur vopn, svo sem hnífar, axir og kylfur. Þá lagði lögregla hald á þýfi; tölvubúnað, hljómflutningstæki og önnur raftæki. Karlmaður á þrítugsaldri var handtekinn. Ekki var ástæða til að úrskurða manninn í gæsluvarðhald þar sem hann gat gert grein fyrir þýfinu og honum því sleppt úr haldi lögreglu. Þá fundust þrjátíu grömm af hassi auk nokkurra gramma af amfetamíni þegar leit var gerð í húsi á Selfossi, dvalarstað konu sem var stöðvuð í fyrrakvöld grunuð um að aka undir áhrifum fíkniefna eða lyfja. Konan og karlmaður sem var í húsinu voru handtekinn, þau eru á fertugsaldri og hafa komið við sögu lögreglu áður. Loks handtók lögreglan á Selfossi sextán ára stúlku í fyrrakvöld fyrir að reyna að smygla fíkniefnum inn í fangelsið á Litla-Hrauni. Hún var með rúmlega tíu grömm af hassi en samvinna lögreglu og fangavarða kom í veg fyrir að henni tækist ætlunarverk sitt. Stúlkunni var sleppt að loknum yfirheyrslum en vegna aldurs þurfa félagsmálayfirvöld að koma að málinu.