Ákærður fyrir þrjár líkamsárásir

Stefán Logi Sívarsson hefur verið ákærður af ríkissaksóknara fyrir þrjár líkamsárásir sem hann framdi á tveimur dögum í apríl síðastliðnum. Ein líkamsárásin er sögð hafa verið sérstaklega hættuleg. Hinar tvær líkamsárásirnar framdi Stefán Logi í félagi við mann á þrítugsaldri sem einnig er ákærður. Ákæran var þingfest í Héraðsdómi Reykjavíkur í gær. Stefán Logi var á ný kominn úr fangelsi og var á reynslulausn þegar hann réðst á sextán ára dreng á heimili sínu. Hann sló drenginn með krepptum hnefa í andlit og maga svo drengurinn féll í gólfið. Síðan sparkaði hann í kvið drengsins þar sem hann lá á gólfinu með þeim afleiðingum að milta drengsins rifnaði. Drengurinn hlaut við árásina lífshættuleg innvortis meiðsl. Rétt rúmum sólarhring síðar réðst Stefán Logi ásamt félaga sínum á mann sem lá í sófa. Þeir slógu manninn mörg högg í höfuð og líkama. Þá sveigði Stefán Logi aftur einn fingur mannsins og beit hann í eyrað. Maðurinn sem varð fyrir árásinni hlaut bitsár, mar, bólgur og fleiri áverka. Seinna sama dag slógu þeir og spörkuðu í stúlku sem var með þeim í bíl. Stúlkan tognaði á öxl og hlaut yfirborðsáverka víða um líkamann. Þá er Stefán Logi ákærður fyrir umferðarlagabrot eftir að hafa ekið bíl réttindalaus. Bílnum ók hann á kyrrstæðan bíl sem kastaðist á annan bíl. Stefán er sakaður um að hafa keyrt viðstöðulaust á bílana. Eftir að Stefán Logi réðst á og stórslasaði sextán ára drenginn fór lögreglan í Reykjavík fram á gæsluvarðhald yfir honum en dómari taldi ekki málsástæður til þess og var honum því sleppt lausum. Rétt um sólarhring síðar framdi hann tvær líkamsárásir í félagi við annan mann. Stefán hlaut tveggja ára fangelsisdóm fyrir líkamsárás árið 2002, svokallaða Skeljagrandaárás, auk annarrar líkamsárásar sem hann framdi sama dag. Hann ásamt bróður sínum sló margsinnis fórnarlambið í andlit og líkama með krepptum hnefum og bareflum, stakk hann og skar með eggvopnum og misþyrmdi honum með öðrum hætti.